Eftir einans níggju døgum varð útselt til ársins Ræstkjøtaveitslu í Aalborg. 

Áðrenn midnátt 14. februar – ein heilan mánað áðrenn veitsluna sjálva – varð boðað frá, at tað var útselt til RÆSTKJØTAVEITSLUNA 2020! 
Tað er ein sonn frøi, at undirtøkan aftur í ár er so ómetaliga góð, og sitandi nevnd við hjálparfólkum takka aftur fyri álitið.

Ræstkjøtaveitslan er ikki bara ársins fyrsta veitsla hjá limunum í føroyingafelagnum í Aalborg, men hon er eisini endaveitslan hjá sitandi nevnd. Aðalfundur verður leygardagin eina viku áðrenn Ræstkjøtaveitsluna, 7. mars 2020 kl. 11.00, og allir limir eru mældir til at luttaka á aðalfundinum og hjartans vælkomnir at stilla upp til nevndarval og/ella senda inn uppskot til broytingar í felagnum (hesi uppskot skulu sendast til alaborg@alaborg.fo og vera felagnum í hendi seinasta lagi 01. mars 2020). 

Tí gleðir sitandi nevnd seg eisini ótrúliga nógv til Ræstkjøtaveitsluna og saman við 70 veitsluglaðum føroyingum enda eitt brak av einum nevndarári. Undir veitsluni hitta vit nýggju nevndina, sum síðani tekur yvir aftaná midnátt. 

Á Ræstkjøtaveitsluni 2020 fáa vit ræsta súpan, ræst kjøt og ein heimabakaðan køkubita og ein kaffimunn omaná. Undir borðhaldinum tríva vit í sangheftið við bestu felagssongunum. Heiðurslimur okkara, Jóanes Nolsøe, skipar føroyska dansinum eftir borðhaldið, og síðani kemur Hans Andrias Jacobsen at spæla til dans til tann ljósa morgun.

Vart tú ov sein/ur at ogna tær atgongumerki til veitsluna, ert tú vælkomin at seta teg í samband við nevndina á Facebook ella á alaborg@alaborg.fo, og tú verður sett/ur á bíðilista. Nevndin mælir samstundis øllum, sum ynskja at selja atgongumerki sítt, til at seta seg í samband við nevndina. Gestalisti verður til Ræstkjøtaveitsluna, og tískil skulu øll nøvn og limanummur samsvara á gestalistanum 14. mars 2020. Limaskapur 2020 er somuleiðis krav fyri luttøku á Ræstkjøtaveitsluni.

Við veitslukvøðu

Nevndin

Viðmerkingar

Viðmerking