Nú árið er farið at halla og tað einans eru fáir dagar eftir av 2017, so hevur Føroyingafelagið í Aalborg ikki fleiri tiltøk á skránni fyri 2017. Men samanumtikið so hevur hetta verið eitt heilt ótrúligt ár, sum hevur gingið yvir alt tað, ið vit í nevndini kundu vænta okkum.

Tá nýggja nevndin tók við í apríl mána í ár, tá gjørdi nevndin greitt, at felagið skuldi verða enn meira virki enn tað var í 2016. So vit satsaðu og hetta sats innihelt m.a. at vit gjørdu fleiri tiltøk og íløgur í felagið. Vit gjørdu eina nýggja barr í Álastovu, ein barr sum er einastandandi vøkur og ikki finst nakra aðrastaðni. Vit øktu um talið av teimum afturvendandi tiltøkunum og nýggj tiltøk fingu eina byrjan. Her kann nevnast: Skattajaktin, Romsmakking, Ladies Night, Politiska framløgu og so byrjaðu vit eisini at vísa føroyskar A-landsdystir, hjá monnum, á stórskíggja. Nú árið endar, so hava vit havt í alt 33 tiltøk. Afturat hesum, so hava vit hvørt fríggjakvøld bjóða útisetum innandura fótbólt, og í vetur  fingu vit tvey innandura ítróttar lið afturat; eitt flogbóltslið, sum spælir hvørt mánakvøld, og eitt fótbóltslið, sum spælir hvørt hóskvøld. So um vit leggja øll hesi tiltøk saman, so hava vit bjóða okkara limum áleið 70 tiltøk í 2017.

Alt hetta hevur meira enn tvífalda limatalið frá 2016 til 2017, og nú 2017 endar eru tað 240 limir í Føroyingafelagnum. Hetta er ótrúliga flott og nakað sum vit í nevndini eru stolt av. Tað, at so nógv leggjast afturat, ger at vit í nevndini hava hug at gera enn meira burturúr 2018. Og í yvirlitinum fyri fyrstu hálvu av 2018 hava vit 17 tiltøk, og vit arbeiða framhaldandi við at fáa enn fleiri tiltøk í yvirlitið. Um vit skulu draga eitt tiltak framum øll hini, sum vit eru sera spenti til, so er tað Føroyskt filmskvøld, sum í veruleikanum er tvey tiltøk. Á hesum kvøldunum vísur Føroyingafelagið føroyskar stuttfilmar á stórskíggja og við á kvøldunum verður Andrias Høgenni, sum fer at greiða frá um filmarnar.

Vit í nevndini gleða okkum at taka í móti 2018 og vit eru so spent, at vit kunnu ikki halda alt loyniligt, sum hendir handan leiktjaldi. So tveir loynidómar, sum vit kunnu almannakunngera, eru at vit í 2018 fara at bjóða limunum møguleika at tekna seg sum lim og rinda fyri limaskapin umvegis heimasíðuna, og so hava vit fingið eina stuðulsavtalu í lag, sum fer at hjálpa um fíggjarliga. Hetta verður kunna meira um seinni í desember.

Nevndin í Føroyingafelagnum vil ynskja øllum okkara 240 limum eini gleðilig jól og eitt av Harranum signað nýttár, við tøkk fyri tað brátt farna.

Viðmerkingar

Viðmerking